Tafatsangana ny Vondrom-pirenena mpanelanelana na Groupe National de Médiation (GNM). Tomponandraiki-panjakana toy ny Praiminisitra sy Ministra teo aloha, Filohan’ny Vaomiera misahana ny fifidianana (CENI) teo aloha, Jeneraly misotro ronono no mpikambana ao anatiny. Mitarika ny GNM i Rakotomanana Hery, Filohan’ny CENI teo aloha. Mpikambana ao anaty vondrona ihany koa i Kolo Roger , Praiminisitra teo aloha sy Andriamahefarivo Johnny, minisitry ny fitsarana teo aloha. Nanao fanambarana ny GNM ny 07 novambra 2023 teny Antsakaviro manoloana ny toe-draharaham-pirenena. « Eo anatrehan’ny toe-draharaha eto amin’ny firenena dia mijoro ny Vondrom-pirenena mpanelanelana. Hikaondoha hijery vahaolana miaraka amin’ny hery velona rehetra izahay », hoy i Rakotomanana Hery, Filohan’ny GNM. Nambarany fa ho fametrahana filaminana eto amin’ny firenena no antony ijoroan’izy ireo. Misokatra ho an’ny hery velona rehetra ny vondrona ary misokatra ny adihevitra ho an’ny tombontsoa ambony ny firenena.
Ra-Nirina
