Nandritra ny “Forum International Afrique Développement” natao tany Casablanca (Maroc), nanamafy ny toky nomeny fa hampandroso ny toekarena Malagasy ny orinasa VIMA (Vision Madagascar). Efa nambaran’ny Vision Madagascar tamin’ny fivoriamben’ny mpamatsy sy mpampiasa vola, tany Paris farany teo fa efa misy fandaharan’asa momban’ny foto-drafitra asa sy ny angovo ho atao eto Madagasikara izay ampiasaina vola mitentina 300 tapitrisa dolara.
Ny 16 sy ny 17 martsa 2017 no nanatanterahana “Forum International Afrique Développement” ka vahiny 1500 avy any amin’ny firenena 20 no tonga nanatrika izany. Anisany nasaina i Madagasikara ka voafidy niaraka tamin’ny delegasiona Malagasy izay nahitana ny Ministry ny Indostria sy ny fampivoarana ny sehatra tsy miankina sy ny Filohan’ny vondron’ny mpandraharaha eto Madagasikara (GEM) ny ny Filoha Tale Jeneralin’ny VIMA, Zouzar BOUKA.
Amin’ny mpandraharaha azy, efa nanatrika ny fihaonana ekonomika iraisam-pirenena maro toy ny fihaonana an-tampony US-AFRICA, “Madagascar-Singapore Business Forum”, “Conseil d’Administration de INVEST AFRICA” (Branche USA) ny tenany ka izany indrindra no nahatonga azy sahy mijoro hitondra ny anjara birikiny ho fampiroboroboana ny toekarena eto amintsika fa indrindra ny fikatsahana ny IDE (Investissement Direct Etrangers) ho an’i Madagasikara.