Socio-eco

MPIASAM-PANJAKANA NIOFANA TENY AMIN’NY ENAM: Mitana andraikitra amin’ny fampandrosoana ny firenena


Mitana anjara asa lehibe amin’ny fampandrosoana ny firenena ny mpiasam-panjakana. Nifampitaona teny amin’ny Colisée Ampasanimalo, ny sabotsy 22 ny «Association des Diplômés en Hautes études administration» na ADHEA  ho fankalazana ny faha-heritaonan’ny fikambanana. Mampivondrona ireo mpiasam-panjakana ambony nivoaka teny amin’ny sekolim-pirenena  manofana mpiasam-panjakana (ENAM)  Androhibe ny ADHEA. Mahatratra 900 ny mpiofana nivoaka teny, araka ny fanazavan’ny  Ramanantsoa Andriamahafaly Rado, Filohan’ny Fikambanana.  Noraisina tamin’ny fomba ofisialy tamin’io fotoana ireo  mpikambana vaovao, mpiofana andiany fahafito tao amin’ny ENAM.   Nanamafisana ny fiarahamiasa eo amin’ny mpiasam-panjakana ihany koa ny hetsika nontanterahana ny sabotsy 22 martsa teo. Nifampizara ireo fomba fanao tsara amin’ny fanatanterahana ny raharaham-panjakana, ny fitantanam-bola, ny diplomasia, ny fifandraisana iraisam-pirenena, ny fivoaran’ny teknolojia vaovao sy ny serasera  ireo mpiikambana. Nambaran’ny Filohan’ny fikambanana fa manana andraikitra hanantanteraka  ny politikam-panjakana  ny mpiasam-panjakana ambony. Ao no  Ministra, Tale Jeneraly,  Sekretera Jeneraly, Tale, mpitantanana sampandraharaha eny anivon’ny ministera tsirairay. « Manana traikefa ary afaka mitondra ny anjara biriky amin’ny fampandrosoana an’i Madagasikara izahay. Isaorana ny fitondram-panjakana nametraka fitokisana aminay », hoy hatrany izy. Nanamafy i Ramanantsoa Andriamahafaly Rado fa olona efa mitana andraikitra eo anivon’ny fitantanana ny raharaham-panjakana no miofana eny amin’ny ENAM.

Ra-Nirina


Laisser un commentaire

Votre adresse e-mail ne sera pas publiée. Les champs obligatoires sont indiqués avec *