Taorian’ny fanambarana ny didim-panjakana amin’ny fametraham-pialan’ny praiminisitra sy ny faneken’ny filohan’ny repoblika izany dia nanambara ny praiminisitra Jean RAVELONARIVO fa tsy mbola nanao sonia izany fametraham-pialany izany izy. Nandainga amin’ny fomba ofisialy ve izany ny eny amin’ny fiadidiana ny repobilika ? Raha izany no dinihina tsy misy azo antoka intsony ny fanambarana satria ny mpitondra faratampony eto amin’ny firenena mihitsy no mandainga am-pahibe maso. Ny mahavarina ny maro ny tenin’ny praiminisitra fa mbola hiera amin’ny fianakaviany izy aloha mikasika ny fanaovana ny sonia fametraham-pialana. Fa angaha ny fitondrana ny firenena an’ny fianakavian’ny mpitondra ? Dia raha tsy manaiky ny ialany izany ny fianakaviana dia tsy hiala ve izany. Tsy misy fanajana na kely akory ny vahoaka malagasy tompon’ny fahefana ny mpitondran’ny firenena.
Nirina R.