Manamora ny fitadiavana asa. Sarotra ny mitady asa ka izany indrindra no nahatonga ny Media Click namorona ny tranokalam-pifandraisana Asako.mg. Noho ny fiarahamiasa eo amin’ny Airtel Madagascar dia maimaim-poana ny fijerena ny tranokala. Tontosa ny zoma 30 septambra 2022 teny Alarobia ny fifanaovan-tsoniam-piarahamiasa teo amin’ny roa tonta. « Tranokalam-pifandraisana ahitana tolotr’asa ny Asako.mg. Maimaim-poana ny fitsidihana ny tranokala raha mampiasa connexion Airtel. Andoavam-bola kosa raha mampiasa tambazotra hafa », hoy i Ratsimbarison Anna, Tomponandraikitrin’ny serasera ao amin’ny Airtel Madagascar. Ahitana ireo tolotr’asa manerana an’i Madagasikara ny tranokala www.asako.mg. “Fahatsapana fa sarotra ny mitady asa nefa maro ihany ireo orinasa mandray mpiasa no nanosika namoronana ny site. Noho izany, hampifandray ireo mpitady asa sy ireo orinasa mitady mpiara-miasa vaovao ity tranokala ity. Ho fanamorana ny fitadiavana no tanjona”, hoy Raminoharijaona Tojo, Tale jeneralin’ny orinasa Media Click nanamboatra ny tranokala. Ho an’ny mpampiasa kosa dia toerana iray ahafahana mitady mpiara-miasa vaovao, mandefa tolotr’asa ao aminy ho hitan’ny besinimaro ny tranokala. “Maimaim-poana ny fandefasana tolotr’asa, ho an’ireo orinasa te handefa izany”. Tolotr’asa dimy (05) isan’andro hatreto no alefa ao ary 500 isan’andro no mitsidika ny tranokala. “Amin’izao fiarahamiasa amin’ny Airtel izao dia hitombo ny mpitsidika”, hoy hatrany Raminoharijaona Tojo. Ankoatra ny fandefasana tolotr’asa dia manome torolalana ho an’ireo mpitady asa momba fanoratana CV, lettre de motivation ihany koa ity tranokala ity.
Ra-Nirina