Nigadona teto Antananarivo io hariva io ny Sekretera Jeneralin’ny Firenena Mikambana, Atoa Ban Ki-Moon   mivady.   Tonga   nitsena   azy   teny   amin’ny   seranam-piaramanidina  Ivato   tamin’izany fahatongavany eto amintsika izany moa ny Filohan’ny Repoblika Hery Rajaonarimampianina mivady, ny Praiminisitra lehiben’ny Governemanta, Mahafaly Solonandrasana ary ireo Minisitra mpikambana ao amin’ny governemanta. Tonga teny an-toerana ihany koa ireo lehiben’ny andrimpanjakana rehetra misy eto amintsika.
Raha tsiahivina, famaliana ny fanasana nataon’ny Filoha Malagasy izao fitsidihan’ny Sekretera Jeneralin’ny Firenena Mikambana eto amintsika izao. Rahampitso no ho raisin’ny Filoha Rajaonarimampianina Hery eny amin’ny lapam-panjakana Iavoloha ity vahiny manan-kaja ity ary hisy ny tafa hiarahana amin’ny mpanao gazety aorian’izany. Mandritra izao fandalovany izao ihany  koa,  hiaona  amin’ny  Filohan’ny  Antenimierampirenena  sy  ny  Filohan’ny  Antenimieran-doholona ity Sekretera Jeneralin’ny ONU ity. Amin’izany fihaonana eny amin’ny lapa eny Anosy izany no  hanaovany  ny  tatitra  mikasika  ny  « Prix  de  la  Faim  à   Madagascar ».
Hihaona  amin’ireo mpiaramiombon’antoka amin’i Madagasikara eto ihany koa ity farany rahampitso, ireo mpisehatra ao amin’ny sehatra tsy miankina, miasa momba ny mahaolona ary ny fiarahamonim-pirenena miasa momba ny zon’olombelona. Ankoatra ireo fihaonana ireo, hitsidika ireo toerana misy ny tetikasa vatsian’ny Firenena mikambana ihany koa Atoa Ban-Ki-Moon mivady.
Raha tsiahivina, taorian’ny fandalovan’i Kofi Annan tamin’ny taona 2006, i Ban Ki-Moon no Sekretera Jeneralin’ny Firenena mikambana   faharoa   nandalo   teto   Madagasikara.   Isan’ny   tanjona   amin’ny   fiarahamiasan’i Madagasikara amin’ny firenena Mikambana moa ny hampihenana ny tahan’ny fahantrana ho 40% hatramin’ny 2019 raha toa ka 52,7% izany tamin’ny taona 2012