Nanamarika ny fankalazana ny taom-baovao Malagasy ny taranaka Ambohidrabiby. Teny amin’ny rova an’Ambohidrabiby ny alatsinainy 19 martsa 2018 no nanatanterahina izany. Tonga nanotrona ity fomba Malagasy ity ny Ambasadaorin’Indonezia. Fampihavanana sy tso-drano no fototry ny taom-baovao Malagasy fa tsy fanompoam-tsampy araka ny eritreritry ny Malagasy sasany. Nanamafy ny Ambasadaorin’ Indonezia fa tsy misy fampandrosoana vanona raha tsy mifamela heloka ny Malagasy.
Taorian’ny fifandimbiasam-pitenenana nandritra ny fankalazana ny taom-baovao Malagasy teny Ambohidrabiby, niroso tamin’ny tso-drano, fihinanana ny vary amin-dronono tondrahan-tantely, ny fizarana salohim-bary ny mpilanonana. Nomarihin’ny filohan’ny taranaka Ambohidrabiby, Rabetrano Andriambololo-Nivo fa amin’ny 07 martsa 2019 ny taom-baovao Malagasy manaraka ho an’ny taranaka Ambohidrabiby.
Fomba fa tsy finoana
Resy lahatra ny Solombavambahoaka an’i Madagasikara, Benjamin Andriamitantsoa sy ny Loholon’i Madagasikara, Andriambololona Mananjara fa tokony atao ara-panjakana ny taom-baovao Malagasy. Raha tanteraka izany, lasa andro tsy fiasana kanefa handraisa-karama sy tsy fianarana ity fomba Malagasy ity. “Tahaka ny fomba Malagasy toy ny famorana, famadihana sy ny maro hafa ny taom-baovao Malagasy fa tsy finoana”, hoy ny Ben’ny Tanana kaominina Ambohidrabiby, Barisoa Andriamananjara. Fampihavanana ihany koa satria mialoha ny hanitsahana ny taom-baovao, mila mifamela heloka ireo manana disadisa. “Tsy ho tanteraka ny fampihavanana raha tsy mifanome hasina ny tsirairay”, hoy ny filohan’ny trano koltoraly Malagasy, Henri Randrianjatovo.
Lynda A.