Hanao fanambarana ny sendika rahariva. Talohan’ny fetin’ny fara-taona dia nanome fe-potoana ny fitondram-panjakana, hatramin’ny 15 janoary mba hanome valiny mahafapo sy maharitra momba ny fitakiany ny Seces (sendikan’ny mpampianatra-mpikaroka sy mpikaroka-mpampianatra) Sampana Antananarivo. Androany 08 janoary 2020 dia mitohy ny hetsika ka nidiana ny vavahady idirana eny amin’ny anjerimanontolo. Nambaran’ny sekretera jeneralin’ny Seces sampana Antananarivo, Masindrazana Graziella fa tapitra ny fety, miditra miasa daholo ny eto amin’ny firenena. “Hatreto dia tsy mbola nahita na taratra faran’izay kely akory amin’izay valiny mahafa-po sy maharitra izahay”, hoy izy.
Nohamafisiny fa mbola ao anatin’ny fotoam-pitokonana ary mitohy ny fitokanana ety amin’ny anjerimanontolo sy ny hetsika isan-karazany. “Santionany amin’izany ny fanidiana vavahady miditra aty amin’ny oniversite, ny fitohizany ny fikatonan’ny oniveriste, ny fanampiana sora-baventy milaza fitakiana, ny fanaovana fivoriambe. Santionany ireo fa arakaraky ny fahatsapanay ny tsy fandrosoan’ny fifampiresahana no tsy maintsy handraisana fanapahan-kevitra amin’ny hetsika fitokonana izay ataonay”. Efa nanao fivoriambe ny sendika ny marainan’ny 08 janoary 2020 saingy anio hariva vao hanao fanambarana ny hevitra tapaka ry zareo.
Lynda A.