Hankalaza ny andro natokana ho an’ny indostria manerana ny Afrika ny firenena Malagasy. Ho marihina mandritra ny telo andro izany. Orinasa vaventy manodina ny akora avy eto Madagasikara miisa 50 hampiranty ny vokatra vokariny ny alatsinainy 20 ka hatramin’ny alarobia 22 novambra 2017, eny amin’ny Lapan’ny Tanana Analakely.
“Tsy mena-mitaha amin’ireo indostria amin’ireo firenena afrikana ny avy eto an-toerana”, hoy ny Ministry indostria, Armand TAZAFY tamin’ny fampahafantarana ireo mpanohana ofisialy ny hetsika, omaly 17 novambra 2017.
Vanim-potoana fanao isan-taona ny hetsika ho fampiroboroboana ny vokatra Malagasy. Mampiavaka ity andiany ity ny fampahafantarana amin’ireo mpandraharaha ny votoatiny ny volavolan-dalana haroso eny amin’ny fivoriana ara-potoanan’ny parlemantera izay efa nolanian’ny vaomiera misahana izany.
Hofaranana amin’ny “gala” ny fankalazana ny andro ho an’ny indostria manerana an’i Afrika. Ny 08 desambra 2017 no hanatanterahina izany. Hikarakara ny sakafo “service traiteur”
an’ny restaurant Manda Sea Food. Hianoka ny sakafo voavoatra amin’ny hazondranomasin’i Madagasikara ny mpilanonana amin’io fotoana io.
Lynda A.