Misedra fandroahana ireo mpianatra sasantsasany mipetraka amin’ny tranon’ny mpianatry ny oniversite Antananarivo eny Ambohipo, Ambolonkandrina, Ankatso I sy II. “Tsy misy ny fifampiresahana fa varavarana voafantsika no nivantanan’ireo mpianatra avy nianatra”, hoy ny filohan’ny fikambanan’ny mpianatra faritra terak’i Androy (FIMPITEA) teo aloha, Kalimahazo. Raha ny dingana ara-dalàna, ny filohan’ny fikambanan’ny mpianatra no miresaka amin’ilay mpianatra raha tsy manara-dalàna izy. Rehefa tsy manaraka ny teniny ilay mpianatra izay vao mampiakatra ny raharaha eny amin’ny tomponandraikitra mitantana ny tranon’ny mpianatry oniversitem-panjakana eto Antananarivo (CROUA).
Ireo mpianatra mandranto fianarana eny amin’ny oniversitem-panjakana ihany no misitraka ireny “cité” an’ny mpianatra ireny. “Miezaka manala ireo mpianatra tsy manara-dalàna ny mpiasan’ny CROUA saingy misy amin’ireo mpianatra manara-dalàna voaraoka ao anatin’izany”, hoy i Kalimahazo. “Assainissement sauvage, sans mesure d’accompagnement” no iantsoan’ireo mpianatra izany. Araka ny fanazavan’ity mpitantana fikambanan’ny mpianatra teo aloha ity dia ny tsy fahavitan’ireo mpianatra ny fanavaozana ny antontan-taratasy amin’ny fampiasana ny trano no antony handroahana azy ireo. Na dia eo aza izany, tokony hisy foana ny fifampiresahana fa tsy mpianatra mbola mianatra no roahina.
Lynda A.