Tanora miisa 500, avy amin’ny firenena 130 no nandray anjara tamin’ny dinika iraisam-pirenena momba ny tanora (dialogue mondial de la jeunesse), natao tany Cotonou Bénin, ny 4 sy 5 Aprily 2024. Nanana solontena nanatrika izany i Madagasikara, i Ratsimba Andriamiravaka sy Ravelomahafaly Andriamihaja Guénolé. Nikarakara ity fivoriana iraisam-pirenena ity ny tahirim-bolan’ny firenena mikambana ho an’ny mponina (UNFPA) ho fanamarihana ny faha-30 taonan’ny fivoriambe iraisam-pirenena momba ny mponina sy ny fampandrosoana (ICPD). Nikarakara atrikasa ny UNFPA, ny 25 Aprily 2024, teny Antaninarenina ho fampahafantarana ny tanora malagasy sy ireo mpisehatra rehetra momba ny tanora eto Madagasikara ireo hevitra, adihevitra nivoaka nandritra ny fivoriana. Tamin’io fotoana io no nizaran’izy mianadahy, solonentan’i Madagasikara ireo tolo-kevitra nivoitra tamin’izany. Nanome tolo-kevitra momba ny zo, ny fahasalamana ara-pananahana, ny fitovian-jo amin’ny maha lahy sy maha vavy, ny fanabeazana, ny fiovan’ny toetrandro ary ny filaminana ireo tanora nanatrika ny dinika iraisam-pirenena. Tolo-kevitra momba ny zo sy fahasalamana ara-pananahana (DSSR), ohatra, ny fangatahan’izy ireo amin’ny fanjakana mba handany ireo lalàna manamora ny fisitrahana ny tolotra momba ny fahasalamana ara-pananahana sy hamorona fehezan-dalàna ahafahana miady amin’ny herisetra mifototra amin’ny maha lahy sy maha vavy. Amin’ny lafiny fanabeazana, nanolo-kevitra ireo mpandray anjara tany Cotonou mba ho maimaim-poana ny fanabeazana ho an’ny tanora rehetra, indrindra any amin’ireo toerana lavitr’andriana. Mangataka ihany koa izy ireo mba ho atao dieny any an-tsekoly sy ivelany ny sekoly ny fanabeazana ara-pananahana ; ovaina ny rafi-pampianarana mba ialàna amin’ny tsy fitoviana amin’ny maha lahy sy ny maha vavy, eny anivon’ny sekoly sy ny fiarahamonina ; ampidirina ao anaty fanabeazana ny resaka fahasalaman’ny saina.
Misoroka ny fanalan-jaza
Voaresaka nandritra ny fivoriana tany Bénin fa i Pays- Bas no firenena ahitana taha ambany indrindra momba ny fampitsaharana vohoka noho ny antony ara-pahasalamana (IVG). « Tsy maintsy ampianarina dieny any amin’ny sekoly ambaratonga fototra ny fanabeazana feno momba ny fananahana ara-pahasalamana. Mbola kely ny ankizy dia efa mahafantatra ny mombamomba ny tenany, ny fahasalamana ara-pananahana, mahay mitandrina , mahay ny tokony atao sy ny tsy tokony atao ka tsy tonga amin’izany vohoka tsy niriana sy fanalan-jaza izany. Azontsika hangalana hevitra izany », hoy i Ratsimba Andriamiravaka, tomponandraikitry ny ODAS (Organisation pour le dialogue pour l’avortement sécurisé) eto Madagasikara, nanazava ny antony mahatonga io taha ambany io. “Mila fiarahamiasa, mila mitambatra isika raha te hampandroso ny fahasalamana ara-pananahana”, hoy izy. Mbola hisy ny fivoriana manaraka, hanaovana drafitr’asa nasionaly momba ireo tolo-kevitra tany amin’ny dinika ireo, raha fanazavan’i Velomahafaly Andriamihaja Guénolé, mpikambana ao amin’ny komity mpanantanteraka ny drafitra stratejika ao amin’ny Jeune Chambre International (JCI).
Ra-Nirina
