Vehivavy mpandraharaha 50 niatrika fiofanana momba ny fanodinana voankazo, ny famokarana vary ary ny fahaiza-mitantana ny orinasa. Avy amin’ny fikambanana 12 mivondrona ao amin’ny “groupement des femmes entrepreneurs de Madagascar” (GFEM) izy ireo. Niompana tamin’ny sehatry ny « agro-industrie » atrikasa ka nandray anjara tamin’ny fampiofanana azy ireo teny amin’ny Pavé Antananinarenina, ny alatsinainy 12 novambra 2018 , ny solontena avy ao amin’ny ministeran’ny indostria sy ny fampiroboroboana ny sehatra tsy miankina, ny ministeran’ny fambolena sy ny fiompiana, ny ministeran’ny varotra sy ny fanjifana ary ny « bureau des normes de Madagascar ».
Ao anatin’ny tetikasa fanampiana ny vehivavy mpikambana amin’ny sehatry « agro-industrie » sy ny paikady hampiroboroboana ny orinasan’izy ireo ity fiofanana ity. Dimy volana ny faharetan’ny tetikasa. « Tanjon’ny fampiofanana ny hampanara-penitra ny vokatra vokarin’ny vehivavy mpandraharaha sy hampiroborobo ny orinasiny. Ho lohany amin’ny resaka indrostria eto Madagasikara ny mpikambana. Manantena fa tsy hijanona amin’ity fotsiny ny tetikasa fa mbola hitohy », hoy ny lehiben’ny tetikasa, Dhoulifao Ali Said. Nizara ny traikefany tamin’ireo mpiofana ireo manam-pahaizana momba fanodinana voankazo, ny famokarana vary ary ny fahaiza-mitantana sy ny fitadiavana famatsiam-bola. Aorian’ny fiofanana, hanaraka akaiky ny tetikasan’ny tsirairay ireo manam-pahaizana. Hamoaka vehivavy matihanina ary hiparitaka manerana ny tsena ny vokatra vokarin’ny GFEM noho ity tetikasa ity.
Lynda A.