Miandry valinteny avy amin’ny praiministra Ntsay Christian na fitondram-panjakana ny SECES Antananarivo. Mangataka valin-teny izy ireo na mbola mitàna ny teny nomeny ny lehiben’ny governemanta na tsia momba ny fitantanana ny oniveriste miankina amin’ny fanjakana sy ny foibem-pikarohana nasionaly. Araka ny fanazavan’ny filohan’ny SECES sampana Antananarivo, Sammy Gregoire fa nanaiky ny vahaolana naroson’ny praministra ny mpampianatra-mpikaroka sy mpikaroka-mpampianatra nandritra ny fihaonana ny 14 aprily 2019 lasa teo na dia tsy nahafa-po 100 % aza izany. Ankehitriny anefa dia mivoana tanteraka sy tsy mifanaraka amin’io fifanarahana io no ataon’ny ministeran’ny fampianarana ambony sy ny fikarohana ara-tsiansa ka nanatanteraka fivoriambe ny SECES Antananarivo ny 12 septambra 2019 teny Ankatso. Nivoitra tamin’ity fivoriana ity fa misy ny fanaparam-pahefana tonga tsy tapaka eny amin’ny oniversite ary manohitohina ny maha olona mihitsy izany. Ohatra amin’izany ny naoty laharana 70/2019/MIN SUPRES milaza fampihantoana ny fanaovana tohan-kevitra hahazoana ny diplaoma doctorat sy HDR mba ho fampanaraham-penitra sy fanarahamaso ny fiasan’ny sekolim-panjakana ambony mamoaka mpiofana hanana ny diplaoma doctorat. “Mety misy ny tsy ara-dalàna, henjeho izay tsy ara-dalàna, ampiharo ny lalàna fa kosa raha toa ka ny fosa no manao ny ataony dia ny saka rehetra ve no ho voatapa-drambo, tsy rariny kosa izany”, hoy i Profesora Ravelonarivo Sammy Grégoire.
Anisany antony nivorian’ny SECES Antananarivo ihany koa ny fifampitondrana eo amin’ny oniveriste sy ny foibem-pikarohana. “Tsy mety aminay ary tsy ekenay velively ny hoe: rehefa hanatanteraka mission scientifique dia tsy maintsy mangataka fahazoan-dalana any amin’ny sekretera jeneralin’ny ministera mpiahy, raha toa ka misy “conférence” ho vonjena any ivelany na sahala amin’izany dia tsy maintsy mangataka fahazoan-dalana any amin’ny primatiora”, hoy ireo mpampianatra-mpikaroka sy mpikaroka-mpampianatra. Nambaran’izy ireo fa misy ny sehatr’asa tsy azo am-piandrasana satria mety hitera-doza. Nanamafy ihany koa ny filohan’ny SECES Antananarivo fa arovan’ny lalàna mifehy anay izahay, ny sata mifehy manokana ny mpampianatra-mpikaroka sy mpikaroka-mpampianatra fa tokony hiasa an-kalalahana tsy misy teritery eo amin’ny sehatry ny fampianarana sy ny fikarohana.
Mbola hivory ity sendika ity amin’ny alarobia ho avy izao ka eo no hahafantarana ny vokatry ny fanapahan-kevitra sy ny famahana olana ataon’ny tomponandraiki-panjakana . “Raha tsy misy izany dia amin’ny alalan’ny fivoriana ihany no hanapahana hevitra indray”.
Lynda A.