Fandidiana mandritra ny 45 minitra dia afaka hanova aingana ny fiainan’ireo olona sima molotra sy vakilanilany, hanampy azy ireo hiaina, hitelina sy hiteny ary hitsiky tsara. Hanolotra fandidiana sy fitsaboana feno ary maimaim-poana ho an’ireo Malagasy manana fahasembanana amin’ny vava sy ativava ny Operation Smile (OS) ho fanamarihana ny fankalazana ny 40 taonany. Fanamby ho an’ny OS ho an’ny 10 taona manaraka ny handidy marary sima molotra sy vakilanilany miisa 15.000 sy marary mila fandidiana hafa eto Madagasikara. Nampahafantarina ny 09 novambra 2022 ity hetsika fankalazana ity ka fantatra tamin’izany fa ankoatra ny fandidiana dia hanampy ireo marary hanana ho avy mendrika ihany koa ny toro-hevitra momba ny sakafo, fikoloana ny ativava, fahaizana miteny sy ara-tsaina omena azy ireo. Fanampin’izay dia hanome tohana momba ny fandidiana ireo aretina isan-karazany sy maika toy ny « césarienne, appendicite, hernie sy ny maro hafa ny Operation Smile ao anatin’izao hetsika fankalazana izao. “Manana vina hanatsara ny sehatrin’ny fahasalamana amin’ny alalan’ny fanomezana fandidiana azo antoka izahay. Mazava ny iraka ho ataonay arak’io vina io. Noho ny fahaiza-manao hanananay amin’ny fitsaboana ny sima molotra sy vakilanilany dia handrafitra vahaolana ahafahana manome fandidiana azo antoka izay tena ilaina izahay”, hoy Rakotomalala Mirana, Country Manager ny OS eto Madagasikara. Manana vina hampiasa vola mitentina 2 tapitra dolara isan-taona ny ONG ka ny 60 % ny tetibola dia hanomezana fitsaboana feno ho an’ny Malagasy teraka sima molotra na vakilanilany ary hanatanterahana paikady hampitomboana ny kojakoja sy hanatsarana ny kalitaon’ny fandidiana fototra sy maika eto Madagasikara ny 40 %. Tafiditra ao anatin’izany ny fanatsarana ny foto-drafitrasa eny anivon’ireo hopitaly mpiara-miasa sy fanamafisana ny fahaiza-manaon’ny mpiasan’ny fahasalamana.
Hetsika mandritra ny fankalazana
Maro ireo hetsika ho karakaraina eto Madagasikara mandritra ny volana novambra ho fanamarihana ny fankalazana ny faha-40 taonan’ny Operation Smile. Santionany amin’izany ny fanokanana ny sampandraharaha fandidiana zaza ao amin’ny hopitaly Joseph Ravoahangy Andrianavalona (CHUJRA) izay nohavaozina tanteraka; ny famelabelaran-kevitra momba ny fitsaboana; ny diabe ho an’ny fitsaboana ahafahana mitsabo marary miisa 160; ny andro natokana ho an’ny fanomezan-drà ho ataon’ny mpiasan’ny OS, mpilatsaka an-tsitrapo ary ireo mpamatsy vola. Hofaranana amin’ny alalan’ny hetsika fampihaonana ireo mpiara-miasa isan-tsokajiny, hanomezana azy ireo mari-pankasitrahana noho ny asa vita ny fankalazana. “Ireo hetsika mandritra ny fankalazana ny faha-40 taonan’ny Operation Smile dia manamarika ny fahavonona hiara-hiasa amin’ny sehatra eo anivon’ny governemanta, ratsamangaikan’ny fampianarana, ny mpiasan’ny fahasalamana sy ireo sehatra hafa mba hanavaozana ny sehatrin’ny fahasalamana eo amin’ny lafin’ny fandidiana. Ny fanomezana fiofanana ao anatin’ny fotoana fohy sy mitohy an’ireo mpiasan’ny fahasalamana dia vahaolana maharitra ho an’ny fitsaboana amin’ny resaka fandidiana”, hoy Rakotomalala Mirana, Country Manager ny OS eto Madagasikara. Hanamarika ny hetsika ho an’ny fankalazana noho izany ny fanatanterahana “spot” entina hanaovana fanentanana izay mampiseho ny asa vitan’ny Operation Smile teto Madagasikara. Fikambanana iraisam-pirenena ny Operation Smile. Any Etazonia ny foibeny ary miasa amin’ny firenena 35. Nandritra ny 15 taona izy no niasa teto Madagasikara. Nahafantarana ny ONG ny fandidiana olona sima molotra sy vakilanilany. Noho ny tambazotra mampivondrona ireo mpilatsaka an-tsitrapo miisa 6000 dia olona 300.000 mahery manerana an’izao tontolo izao no vita fandidiana nanomboka ny 1982. Malagasy 4000 kosa no nisitraka izany. Ankizy ny ankamaroan’izy ireo.
Ra-Nirina