Hiaro ny zon’ny tsirairay, hanabe sy hitaona ny Malagasy ho samy handray andraikitra tandrify azy ny fikambanana MA.M.A na “Malagasy Mandray Andraikitra”. Ny 18 mey 2018 no nitsangana ara-panjakana ny fikambanana. Christian Rakotozanany no filoha mpitarika. Eto Antananarivo ny foiben-toerany fa misandrahaka manerana ny Nosy. “Hanomboka hidina ifotony ny fikambanana raha misy tsindry hazo lena mianjady amin’ny vahoaka Malagasy”, hoy ny filohan’ny MA.M.A.
Hiaro ny harem-pirenena voajanahary ambany sy ambony ary ao anaty rano tsy ho robain’ny olom-bitsy sy ny vahiny, hikajy ny tontolo iainana ho lovain-jafy, hitandro ny fihavanana sy ny soatoavina ary ny kolontsaina izay mampiavaka sy mampirindra ny fiarahamonina Malagasy, hamoha indray ny afom- pitiavan-tanindrazana ao anatin’ny fon’ny Malagasy tsirairay ny fikambanana MA.M.A. Noho izany, miantso ary manainga ny Malagasy tsy vaky volo miombon-kevitra aminy ny fikambanana ho fampandrosoana an’i Madagasikara. Nilaza ny mpitondra tenin’i MA.M.A fa miantso an’i Andry Rajoelina ho kandida amin’ny fifidianana filoham-pirenena. Mipoipoitra avokoa ity fikambanana rehetra ity amin’izao fifidianana izao. Ho tanteraka tokoa ve ireo tanjona tian’izy ireo ho tratrarina raha tokoa ka tsy lany ho filoham-pirenena ny kandida tohanany?
Lynda A.