Ny 18 septambra 2018 ka hatramin’ny 01 janoary 2019, hiranty ao amin’ny mozea Quai Branly – Jacques Chirac ao Paris ny kanto, tantara, kolontsaina an’i Madagasikara. Amin’ny alalan’ny kanto miisa 360 toy ny sary sokitra ampiasaina amin’ny fahafatesana, hosodoko, sary, asa famoronana no hampahafantarana ny mombamomba ny Nosy Malagasy. Hisokatra amin’ny fomba ofisialy ny alatsinainy 17 septambra 2018 ny fampirantiana. Hanatrika izany ny mpankafy kanton’i Madagasikara, mpiantsehatra amin’ny fampandrosoana an’i Madagasikara tahaka an’ny vondrona SIPROMAD.
Fanohanana
Taorian’ny fahazoan’ny vondrona Sipromad ny orinasan-tserasera “Thomson Broadcast” tamin’ny volana aogositra 2018 dia manana birao any Frantsa ny vondrona Sipromad. Tamin’ny alalan’ny fanampian’ny Sipromad no nanamboarana ny trano natokana ho an’ny fitaovana ampiasaina amin’ny mozika ao amin’ny mozea Quai Branly mba hisarihana ny olona hitsidika sy hamantatra ny momba ny Nosy Malagasy. Ny fanohanana amin’ny sehatry ny kanto sy ny kolontsaina dia ao anatin’ny tetikasan’ny vondrona Sipromad. Ho fanehoan’ny vondrona fa miasa eto Madagasikara, mandray andraikitra amin’ny lafiny sosialy sy fanatsarana paikady hampiroboroboana ny endrik’i Madagasikara amin’ny alalan’ny fizahantany sy ny kolontsaina ary fanamafisana ny fiarahamiasa amin’ny lafrantsa no anton’izao fanohanana izao.
Nirina R.