MEDAIR Socio-eco

MEDAIR: Nanavotra aina ny hetsika « réveillons l’humani-terrien en nous »


Avotra ny mpiray monina amin’i Tsiveregna.Nifarana tamin’ny fomba ofisialy ny 28 febroary 2020 teny Antaninarenina ny « réveillons l’humani-terrien en nous ». Hetsika nentin’ny MEDAIR eto Madagasikara nanamarihany ny faha-30 taona nisian’ny ONG izy ity. Nanomboka tamin’ny 23 mey 2019 ny tetikasa ka hetsika maro no natao nandritra ny valo volana. Anisan’izany ny fanomezan-drà teny fitehirizan-drà eny Anosy, ny fampirantiana ireo sary nalain’i Pierrot Men, mampiseho ny tsy fitovian’ny zava-misy any Atsimo sy Avaratr’i Madagasikara vokatry loza voajanahary. ONG iraisampirenena miasa amin’ny fanampiana ny maha olona toy ny fanavotana aina noho loza voajanahary ny MEDAIR. Nandritra ny hetsika fitadiava-mbola tao anatin’ny « réveillons l’humani-terrien en nous » hatrany dia vola mitentina 2.800.000 Ariary no voaangona, entina hanamboarana vovon-drano ho an’i mpiara-monina amin’i Tsiveregna ao amin’ny fokontany Mahafaly Sud,faritra Androy. Raha ny sary nalain’i Pierrot Men no faritana dia tovovavy kely maka rano eo amin’ny fotaka i Tsiveregna.

Araka ny fanazavan’ny tomponandraikitry ny seraseran’ny MEDAIR, Rakotomavo Chrystelle fa efa manomboka ny fanamboaran’ io foto-drafitr’asa io. Tsy azo adinoina ihany koa fa nentina namohazana indray ny finiavana hanampy ny mpiara-belona ity hetsika ity. Mpilatsaka an-tsitrapo 46 no notolorana mari-pankasitrahana ankoatra ireo orinasa nanohana ny hetsika. Tsy mijanona hatreo ny fanavotana aina ataon’ny ONG fa mitohy hatrany.

Nirina R.


Laisser un commentaire

Votre adresse de messagerie ne sera pas publiée. Les champs obligatoires sont indiqués avec *