Vohoka tsy niriana 273.000 no voasoroka noho ny fampiasana fomba fandrindram-piterahana. Tamin’ny alalan’ny tetikasa SIFPO 2, afaka nanaparitaka ny fomba fanabeazana aizana manerana ny faritra 22 ny Marie Stopes Madagascar (MSM). “Nandritra ny fito taona no namatsy vola ity tetikasa ity ny vahoaka Amerikana (USAID). Efa nisy ny andiany voalohany ary nifarana tamin’ity volana septambra 2017 ity ny andiany faharoa”, hoy ny Tale’ny fandaharan’asa ny MSM, Lalaina RAZAFINIRINASOA.
Manodidina ny 680.000 teo fomba fanabeazana aizana naparitaka. Tafiakatra 16% ny vehivavy resy lahatra tamin’ny fampiasana ireo karazana fomba fandrindram-piterahana toy ny fihinanana pillule, fanaovana DIU,fampiasana fimailo… Nambaran-dRamatoa Lalaina RAZAFINIRINASOA hatrany fa noho ny fampahafantarana ny tombontsoa azo avy amin’ny fandrindram-piterahana, 300 isan-taona ny lehilahy nisafidy ny Vasectomie, nandritra ny fe-potoanan’ny tetikasa.
Hitohy ny fanentanana.
Na dia tapitra aza ny fiaraha-miasan’ny MSM amin’ny USAID, mitohy ny famporisihana ny tokantrano Malagasy handrindra ny fiterahana. Mpiara-miombona antoka hafa indray no hiara-hisalahy amin’ny MSM amin’ny fanatanterahana izany.
Nirina R.