Vondrona eraopeanina Socio-eco

Herinandron’i Eraopa: Mampisongadina ny asa fanaovan-gazety


Mpanao gazety roa vavy no nandrombaka ny loka tamin’ny fifaninana nokarakarain’ny vondrona eraopeanina. Tafiditra ao anatin’ny fandaharam-potoana momba ny fankalazana ny faha-60 taona niarahan’ny vondrona eraopeanina niasa tamin’i Madagasikara ity fifaninanana natokana ho an’ny mpanao gazety ity. Judith Rakotovao, mpanao gazetin’ny onjam-peo RTA Mahajanga sy i Sandra Miora Hafalianavalona avy ao amin’ny « Business Magazine » an’ny vondrona « L’Express Madagascar » no nahazo ny loka tamin’izany. Ankoatra ny amboara, nozaraina solosaina, fakan-tsary, fandraisam-peo…izy roa vavy ireto ny 07 mey 2018.  Niompana tamin’ny faha-60 taona niarahan’ny vondrona eraopeanina sy i Madagasikara, ny zava-bita sy ny vinavina amin’ny ho avy amin’ny lafiny tamberinandraikitra sy ny fangaraharana lohahevitra tamin’ny fifaninanana.

Amin’ny sabotsy 12 mey 2018 vao hifarana ny fankalazana ny faha-60 taonan’ny fiarahamiasan’ny vondrona eraopeanina amin’ny firenena Malagasy. Hisy ny fandefasana sarimihetsika vahiny hatramin’ny famaranana ny herinandron’i Eraopa. Araka ny fandaharam-potoana, azo jerena maimaim-poana ao amin’ny “Institut de Français de Madagascar” (IFM)  ny horonan-tsary “Stranger in Paradise” sy “Barbara”. Amin’ny 5 ora hariva ny voalohany ary amin’ny 7 ora kosa ny faharoa. Hofaranana amin’ny alalan’ny fampahafantarana ny tetikasa sy ny tantaran’ny vondrona eraopeanina ny hetsika.

Lynda A.


Laisser un commentaire

Votre adresse de messagerie ne sera pas publiée. Les champs obligatoires sont indiqués avec *