cellule de la lutte contre la cybercriminalité Socio-eco

CYBERCRIMINALITE: Misokatra ny varavarana ho an’ireo iharam-pahavoazana


Voasazin’ny lalàna ny fihoaram-pefy amin’ny fampiasàna ny tambazotran-tserasera toy ny fitarihana olona tsy ampy taona hanao mamoa-fady, ny fangalarana ny mombamomba olona iray, ny fanompàna olona, ny fitarihana adim-poko, ny  fisolokiana… Tsapa anefa hoy ny ministry ny serasera sy ny kolontsaina, Andriatongarivo Rakotozafy Lalatiana fa marobe ny tranga momba ny heloka atao amin’ny fitaovan-tserasera (cybercriminalité) kanefa tsy mahafantatra ireo iharam-pahavoazana hoe aiza no itodihana. Ho fanampiana azy ireo indrindra no antom-pisian’ny rafitra miady amin’ny heloka atao amin’ny fitaovan-tserasera na ny “cellule de la lutte contre la cybercriminalité” na CLCC. Nampahafantarina tamin’ny alalan’ny varavarana misokatra, natao teny amin’ny tranom-bokim-pirenena Anosy androany 16 aogositra 2019 ny asa sahanin’ity rafitra eo ambany fiadidian’ny ministeran’ny serasera sy ny kolontsaina ity.  Nambaran’ny mpandrindra ny CLCC, Lieutenant Colonel Andrianarisaona Herilalatiana fa rafitra hifanampy amin’ny polisim-pirenena sy ny zandarimariam-pirenena amin’ny ady atao momba ny “cybercriminalité” ny CLCC fa tsy araky ny tsaho mandeha fa hanafoana ny rafitra efa misy.

Andraikitra voalohany ho sahanin’ity rafitra ity ny fanabeazana ny olom-pirenena mba hampiasa ny fitaovan-tserasera toy tambazotran-tserasera isan-karazany (facebook, twitter…) ho amin’ny mahasoa, ny fampahafantarana ny lalàna mifehy ny “cybercriminalité”, ny sazy miandry ireo mihoa-pefy. Hanampy ireo iharam-pahavoazana  vokatry ny fampiasàna ny tambazotran-tserasera, hanohana azy ireo araky lalàna fa indrindra ny fitondrana ny raharaha eny anivon’ny mpitandro filaminana ny CLCC. Mbola voafaritra ao anatin’ny anjara asany ihany koa ny fanenjehana ny manao tsy mety. “Ndao hampiasaina ho an’ny mahasoa ny tambazotran-tserasera”, araka ny fanentanan-dRamatoa ministra ho an’ny  olom-pirenena.

Lynda A.


Laisser un commentaire

Votre adresse de messagerie ne sera pas publiée. Les champs obligatoires sont indiqués avec *