Miezaka mampisongadina ny asa tanana Malagasy ny Chez’Elles. Nanomboka ny 18 desambra 2019 ka hatramin’ny sabotsy 21 desambra 2019 eny amin’ny zaridainan’Antaninarenina tsenaben’ny asa tanana malagasy, karakarain’ny Chez’Elles. Vita malagasy daholo no vokatra hampirantiana mandritra ny efatra andro, manara-penitra ny kalitao ary amin’ny endrika amam-bika isan-karazany. Anisany mampiavaka ity andiany ity ny tolotra omen’ireo mpandray anjara ho an’ny mpitsidika izay mpamokatra sy mpivarotra asa izy ireo. Araka ny fanazavan’i Ratrimoson Stéphanie, mpikarakara ny hetsika fa nosafidiana manokana ny zaridainan’Antaninarenina noho izy toerana manan-tantara. “Mino aho fa tsy kisendrasendra nisafidianana ity toerana ity. Eto ny tsangambato manamarika ny fahaleovantena”, hoy i Andriamananoro Augustin, solontenan’ny fiadidiana ny Repoblika . Nohamafisiny hatrany fa manohana ny hetsika tahaka itony ny fitondram-panjakana, ny governemanta satria manandratra avo ny asa tanana malagasy, mampisongadina ny maha malagasy. Manentana ny Malagasy rehetra ny mpikarakara, hanjifa ny asa tanana malagasy mandritra “kanton’i Gasikara” mba tsy ny vahiny ihany hankafy izany sady tsy misy vidim-pidirana raha teo.
Nanokatra izany tamin’ny fomba ofisialy ny solontenan’ny fiadidiana ny Repoblika Andriamananoro Augustin, ny solontenan’ny faritra Analamanga ary ny tale jeneralin’ny asa tanana avy amin’ny ministeran’ny indostria, ny varotra sy ny asa tanana. Nambaran’ny tomponandraikitry ny Chez’Elles, Ratrimoson Stéphanie fa hetsika ho fanandratana ny maha malagasy sy hanomezana lalam-barotra ho an’ny mpanao asa tanana malagasy ny “kanton’i Gasikara”.
Nirina R.